អូស្ត្រាលី: នាយករដ្ឋមន្ត្រីអូស្ត្រាលី លោក Scott Morrison គ្រោងនឹងប្រកាសសាងសង់មូលដ្ឋាននាវាមុជទឹកនុយក្លេអ៊ែរថ្មីតម្លៃ ១០ពាន់លានដុល្លារអូស្ត្រាលី ដោយព្រមានប្រជាជនអូស្ត្រាលីថា ជម្លោះរបស់រុស្ស៊ីជាមួយអ៊ុយក្រែននឹង "រាលដាលដល់ឥណ្ឌូប៉ាស៊ីហ្វិកដោយជៀសមិនរួច"។

លោក Morrison គ្រោងនឹងបង្ហាញ ផែនការ មូលដ្ឋាននាវាមុជទឹកនុយក្លេអ៊ែររបស់ប្រទេសអូស្ត្រាលី ក្នុងអំឡុងពេលសុន្ទរកថាទៅកាន់វិទ្យាស្ថាន Neoliberal Lowy ក្នុងទីក្រុងស៊ីដនី នៅថ្ងៃចន្ទនេះ បើយោងតាមសុន្ទរកថារបស់លោកដែលត្រូវបានដកស្រង់ដោយប្រព័ន្ធផ្សព្វផ្សាយក្នុងស្រុក។

លោក Morrison ព្រមានថា ជម្លោះរបស់រុស្ស៊ីជាមួយអ៊ុយក្រែននឹង «រាលដាលទៅតំបន់ឥណ្ឌូប៉ាស៊ីហ្វិកដោយជៀសមិនរួច» ហើយថាអូស្ត្រាលី «ប្រឈមមុខនឹងបរិយាកាសសន្តិសុខដ៏លំបាក និងគ្រោះថ្នាក់បំផុតរបស់ខ្លួនក្នុងរយៈពេល ៨០ឆ្នាំចុងក្រោយនេះ»។

ទីតាំងចំនួនបីត្រូវបានគេរាយការណ៍ថាត្រូវបានជ្រើសរើសសម្រាប់មូលដ្ឋាននាវាមុជទឹកនុយក្លេអ៊ែរ ពីរនៅ New South Wales និងមួយនៅ Brisbane រដ្ឋ Queensland ។

រដ្ឋមន្ត្រីក្រសួងការពារជាតិអូស្ត្រាលី លោក Peter Dutton បានអះអាងកាលពីថ្ងៃអាទិត្យថា អូស្ត្រាលីនឹងទទួលបាននាវាមុជទឹកដើរដោយថាមពលនុយក្លេអ៊ែររបស់ខ្លួន “លឿនជាងការរំពឹងទុក”។ ជាផ្នែកនៃកិច្ចព្រមព្រៀង AUKUS របស់ខ្លួនជាមួយសហរដ្ឋអាមេរិក និងចក្រភពអង់គ្លេស អូស្ត្រាលីត្រូវបានសន្មត់ថាដំបូងនឹងមាននាវាមុជទឹកនៅឆ្នាំ២០៤០៕